“Yêrêvan xeber dıde” koça xwe bar kır -///=> ANP
“Yêrêvan xeber dıde” koça xwe bar kır
2021-04-17  
Rojnemevan û dılsozê Kurdewariyê, nivîskar û rewşenbîrê Kurd, welatparêzê gelê xwe, yê navdar, xwedanê dengê “Yêrêvan xeber dıde”, Keremê Seyad çû ber dilovanîya xwe. Foto : Arşiva rojnemevan Titalê Kerem

Keremê Seyad, jiyaneke serbılındi û rumet

“Yêrêvan xeber dıde” koça xwe bar kır

Roni Alasor

Brussels, 28 March 2021 - Middle East Diplomatic - Rojnemevan û dılsozê Kurdewariyê, nivîskar û rewşenbîrê Kurd, welatparêzê gelê xwe, yê navdar jı gundê Hako hemberi Ava Erez û Digorê, Keremê Seyad di 82 saliya xwe da, dı 27-ê Adara sala 2021-ê lı Rewanê konê xwe ji nav me bar kir û çû ber dilovanîya xwe.

Dengê Keremê Seyad – «Yêrêvan xeber dide!..», 55 salan xet û sînorên kolionyalizma dıji Kurda nas nekirin û bûbû dengê dîroka me û sîmbola dengê Kurdên komarên Sovîyêta berê bes her wısa hızkıriyê seranserî Kurdistanê.

Wek zarok ez dengê Apê Kerem, dengê zelal û xwemal, dengê şabun û axina wi bo Kurda dı zaroktiya xwe vırda dınasım. Baş tê bira mın, dema dıbu esır / berva êvar, guhê bavê mın, Memedê Ahmed herdem lı ser programa Radyoa Rewanê bu. Dema Keremê Seyad digot : “Êrîvan xeber dide, guhdarên ezîz”, bavê mın nedıhişt em bıaxıfın.

Dema ku mın hezdıkır pışta radyoya bavê xwe ya Delta 8 Transislatorê vekım û bınêrım ka ki zındi dıaxıfe, şer û tev çun derdıket. Braê mın Nuredin radyoya Delta 8 Transislatorê lı bacarê metropolê İzmirê sala 1973’a 825 panotê tırka kıribu. Dema ku mın radyoya bavê xwe Bebo xerab bıkıra, Heci Zahır Bahadır ra karê temirkırınê derdıket. 

Berya dılovaniya Apê Kerem, mın gelek ced kır ku ez wi kesê eziz û rumet ra bıaxıfım û hezkırın û rêza xwe jê ra diyar bıkım. Bes mıxabın jı bo sedemên tendurustiya wi mın û kurê Apê Kerem, rojnemevanê hêja Kek Titalê Kerem me derfet nedit. 

Belê “Yêrêvan xeber dıde” koça xwe bar kır bes kurê Apê Kerem, Tital misyona bavê xwe dom dıke.

Prîskê Mihoyî, rojnamevanê emekdar yê Komara Ûdmûrtyayê (Rûsya) derheq koçkırına Apê Kerem wıha nivisiye :

Yazîya malbeta Keremê Seyad jî mînanî yazîya gelê me ye. Sala 1918-an, gava tirkên osmanî dikevine Qersê, malbeta kalkê wî–Xalitê Çolo jî tevî hemû êzîdîyên Serhedê ji ber zulm û zora leşkerên Roma Reş direve, berê xwe dide Ermenistanê. Cerdevanên Romê Xalitê Çolo tevî 50 zilamên êzîdîyan digirin û bi hovane dikujin. Tenê lawekî Xalitê Çolo – Seyad û çend neferên malbeta wan ji wê xezayê xilaz dibin. Ew û gelek malên ji êla sîpka xwe çemê Arpaçayê dixin, derbazî Ermenîstanê dibin û li gundê Heko (navçeya Talînê) dihêwirin, bi wê hêvîyê û gumanê, ku zûtirekê şer û dewê bisekinin û ewê dîsa vegerine gundê xwe Êngyûkê, kîjan li navçeya Dîgorê ya devera Qersê va girêdayî bû.

Sala 1920-î Komara Ermenîstanêye Sovîyêtê tê damezirandinê. Di navbera Ermenîstanê û Tirkyayê da sînor tê avîtinê. Rê û dirbên berbi miskenê kal û bavan tên birînê. Lawê Xalitê Çolo – Seyad tevî çend malên pismamên xwe diçe Tbîlîsîyê. Piştî çend salan ew dîsa vedigere Ermenîstanê û li gundê Heko cîwar dibe.

30-ê kanûna sala 1938-a hema li wî gundî, di mala Seyadê Xalit û Gula Bêmal da ewledê kurîn hate dinê. Navê wî danîn Kerem.

Kerem xwendina xweye navîn di dibistana gundê Hekoye dehesale da werdigre. Salên hînbûnêye li dersxanên bilind şureta wîye rojnamevanîyê dîhar dibe. Nûçe û gotarên wîye biçûk li rojnama navçeyêye «Bolşêvîkyan droşov» («Ala bolşêvîkan») çap dibin, dû ra nivîsên wî li rojnamên Komarêye bi navên «Avangard», «Sovêtakan Hayastan» («Ermenîstana Sovîyêtîyê»), «Komûnîst» dertên, lê ji sala 1955-an da usa jî gotarên wî li ser rûpêlên rojnama «Rya teze» tên çapkirinê û bi radyoya kurdî ya Ermenîstanê tên weşandinê…

Sala 1960-î serokê radyoya Ermenîstanê yê beşa kurdî Xelîl Mûradov Kerem wek rojnamevanê xweyşuret vexwendî radyoyê dike û hildide li ser xebatê. Berî wî çaxî dengkirina bi radyoya kurdî rojê nîv sehet bû. Eznîva Reşîd û Emerîkê Serdar jî bêjer bûn. Sala 1958-an Mustefa Barzanî tê Ermenîstanê. Ew li ber serokatîya Komara Ermenîstanê û li Moskvayê jî li ber berpirsyarên Komîtêya Navendî ya partya komûnîstên Yekîtîya Sovîyêtê pirsê pêşda dikişîne, ku dema xeberdanên radyoya me zêde bikin û goveka pêlên wêye weşanê jî fireh bikin, da ku li Kurdistanê jî bikaribin radyoyê guhdarkin. Zûtirekê dema xeberdanên radyoyê zêde dikin, ji nîv sehetê dikine sehet û nîvekê. Lema jî meha nîsana sala 1961-ê di beşa radyoya kurdî da 12 karmendên nû tên hildanê.

Gelekî balkêşe, gava spîkêrê radyoya Moskvayê, yê di cîhanê da naskirî Yûrî Lêvîtan sala 1977-an tê Yêrêvanê, ew tevî spîkêrên radyoya Ermenîstanê sêmînarê derbas dike. Lêvîtan dengê Keremê Seyad bilind qîmet dike û karta xwe ya vexwendinê dîyarî wî dike.

Piştî wefatbûna Xelîl Mûradov sala 1981-ê serokatîya radyoya Ermenîstanê karmendê emekdar Ahmedê Gogê wek berpirsyarê sereke yê beşa kurdî destnîşan dike. Ew heyanî sala 1992-an kar dike. Paşî wê yekê, gava Ahmedê Gogê diçe ber dilovanîya Xwedê, Keremê Seyad dibe berpirsyarê sereke. Di nava dîroka radyoya kurdî da ew salên gelekî dijwar û çetin bûn.

Dîhare, ku piştî hilweşbûna Sovîyêtê rewşa radyoya me yekcar xirab dibe. Ji ber ku dû jevberdana Yekîtiya Sovîytê ra halê aborî li Ermenîstanê zef çetin bû. Gelek rewşanbîrên kurd ji Ermenîstanê derketin, di wê jimarê da karmendên radyoya kurdî jî berê xwe dane welatên dereke. Ji 12 karmendên radyoyê tenê Keremê Seyad ma. Kesên tercme bikirana tune bûn. Kesên nûçe û gotar binvîsyana tune bûn. Kerem him bû wergêrvan, him bû gotervan, him jî spîkêr.

Rojekê berrpirsyarekî radyoya Ermenîstanêye civakî – serokê beşên xeberdanên bona welatên der Vladîk Zadayan gazî Keremê Seyad dike û dibêjê, ku ew tenê maye, divê beşa radyoyê ya kurdî bê dadinê.

Keremê Seyad dijî vê biryarê dertê û dibêje, ku van rojên nêzîk ewê karmendan peyda bike. Piştî çendekê ew law û keça xwe – Tîtal û Leylê, her usa jî karmenda berê Gulîzera Memê tîne radyoyê û hildide li ser kar. Bi wî awayî, bi saya hereketê Keremê Seyad radyoya kurdî ya Ermenîstanê nehate dadanê. Eva emekê Keremê Seyad yê herî mezine.

Kê li dewsa Keremê Seyad bûya, wê bihîşta û biçûya Rûsyayê li bal bira û pismamên xwe. Wana bona malbata Keremê Seyad derfet û mecalên baş amade kiribûn û gazî wî dikirin. Lê Keremê Seyad neçû, ewî dest ji radyoyê nekişand. Tevî Tîtal û Leylê ewî wan salên giran destbi amadekarina bernamên bi taybet kir.

Keremê Seyad wek berpirsyarê radyoya kurdî heyanî sala 2016-an kar kir. Lê ji wê salê heyanî roja îroyîn kurê wi Tîtalê Kerem wî karê sîyanet didomîne.

Keda Keremê Seyad 50 salan ya li beşa radyoya Ermenîstanêye kurdî ji hêla Serokkomarê Ermenîstanê û serokatîya radyoya Ermenîstanê va bilind hatiye qîmetkirinê. Ew layiqî xelata «Qelema zêrîn» û sîyanetnaman bûye.

Sala 2006-an Keremê Seyad ji alîyê Serokkomarê Ermenîstanê da bi mêdala zêrîn hatiye rewakirinê û hêjayî navê rojnamevanê Ermenîstanêyî emekdar bûye.

Herêma Kurdistanê wî vexwendî dike û ew diçe Kurdistana Başûr. Kurdistan ûsa li ber çavê wî xweş û şîrîn bû, tê bêjî ew hatbû çikilê buhuştê.

Ew dengê dewranekê heta-hetayê kete nava dîrokê, bû xewna şeva, sertaca kêlman û hikyata batinî. Sed heyf, ku ewî dengê zîz, wê akila şîrîn îdî emê zêndî nebihên. Bêguman, ew dengê ji bo me bibe dengê hisretê, dengê dewrana tevgerê, xwehesînê û xwenaskirinê…

Çevkani ;Bı dengê TİTALÊ KEREMÊ SEYAD – XUDANÊ DENGÊ DEWRANEKÊ:

https://ku.armradio.am/2021/04/16/yerevan-xeber-dide-16-04-2021/

 

 

 



Print


.
2021-04-17 - 05 :23    “Yêrêvan xeber dıde” koça xwe bar kır
2020-03-31 - 14 :45    KURD ÇAWA BUN `miletê êzidî` ?
2020-02-28 - 15 :32    Kurdî qedera min e
2020-01-29 - 12 :58    JİYANA NIViSKARÊ KURD ELÎYÊ EBDILREHMAN
2019-09-07 - 04 :49    YEKİTİYA KURDA, ROLA SEROK Û PARTİYÊN KURD
2018-08-21 - 16 :14    Nirxandina Islama Siyasî di neynika wêjeya Kurdî de
2015-01-24 - 04 :34    WEZÎRÊ EŞO ÇU SER DILOVANİYA XWE
2013-01-01 - 06 :21    Dimilkî yek ji zaravayên zimanê Kurdî ye
2012-01-22 - 12 :06    Dostaniya Cegerxwîn û H. Emînê Perîxanê ba Ermeniya
2012-01-14 - 01 :24    Mihemedê Siloyê Bava koça xwe bar kir...
2012-01-14 - 00 :55    Prof. Dr. Wanli çû ser dilovanîya xwe
2011-11-08 - 22 :00    Mêrxasê Sovyetê: Semendê Elî Sîabendov
2011-10-15 - 02 :00    Jiyan û xebata Mehmed Uzun
2011-09-18 - 01 :32    Jiyan a nivîskarê kurd Eskerê Boyîk
2011-03-17 - 01 :54    Barzanî: Divê em hev xaîn îlan nekin
2011-02-08 - 02 :25    Dîktatorek diçe yek tê
2010-11-16 - 00 :03    Pêncî saliya şewata zarokên sînema Amûdê
2010-11-13 - 20 :48    Girîşayê Memê ji nav me koç kir
2008-06-27 - 01 :42    Dewletên Kurd di dema Îslamê da
2008-04-27 - 00 :38    Diroka Rojnamegeriya Kurdî li Rojavayê Welat



About us  |  Contact information
Copyright 2008, ANP. All rights reserved.
Powered by Med Diplomatic